ئێ ئاشه وه ئێ سۊرا نیه‌ڕه‌سێ / جه‌لیل ئاهه‌نگه‌رنژاد
شاهات کارمه‌زرنه‌یل بۊشن «ئه‌ر خوه‌ره، وه‌ێ وه که‌چه‌ڵ، نه‌ر وارانه وه‌ێ وه که‌چه‌ڵ!». یانێ یه گ ئیمه ئه‌گه‌ر قه‌ره‌نتینه نه‌که‌یم، ده‌نگ چه‌ق په‌ڵ نیه‌یلێده‌مان و ئه‌گه‌ر داواێ خه‌ڵک ئڕاێ قه‌رنتینه ئه‌ژنه‌ویم و دار و دکانێان بوه‌سیمن، هه‌م ده‌نگ بڕێگ به‌رزتر له جارانه. وه ڕاس هه‌ر دو گه‌پ درسه.
له دید کوومه‌ڵناسی، له نیشتمانمان له ناو ئێ ساڵانه، کارێگ ئه‌و په‌رتق نه‌چێه. هه‌ر گامێگ تواێ ئڕاێ کاریگ هێز بگرێ، ته‌نیا تواسێه خه‌ڵک بزانن کارێگ بۊه. یانێ وه قه‌وڵ عه‌ره‌وه‌یل، ئیمه وه «ته‌زاهر» خه‌ڵه‌تیایمنه نه یه گ کاریگ درس ئه‌و په‌رتق بچوود!
هڵایه 10 مانگه کورونا میه‌وان «خوڵک‌نه‌کریاێ» نیشتمانمانه. نه نیشتمان ئیمه، گ نیشتمان وڵاته‌یل گشتێ!. هه‌ر وڵاتێگ ئڕاێ خوه‌ێ حساو و کتاوه‌یلێ کردێه و ئڕاێ هه‌ر گیچه‌ڵێگ، فه‌ڕاشه‌ێگ ها له ده‌سێ. وه ڕاس ئه‌گه‌ر بایمنه‌و سه‌ر وڵاته‌گه‌ێ خه‌ومان، دۊنیمن فره چشته‌یڵ له شوون خوه‌ێان نیین.
نه کاروه‌ده‌س وه بوون سه‌ڕژده وه نیشتێه‌سه شوون کارێگ! نه به‌رنامه‌ێگ ئڕاێ فره له کاره‌یل بانان ها له وه‌ر ده‌سێ! و ه‌زار گه‌پ نه‌وه‌تیاێ تره‌ک. ئێرنگه‌یشه ئڕاێ کورونایش هه‌ر ئێ گه‌په دێریمن. مه‌ردم ها له هۊرێان هناێ له چین قه‌ره‌نتینه کردن، چۊ گشتێ کپیانه ماڵه‌و و چۊ قانوون وه ده‌س کارمه‌زرن و خه‌ڵک، دنیاێ ئه‌و ڕووژه‌یل ئه‌و نیشتمان گه‌ورا سڕ و کوڕ کرد.
قانوون ئێرنگه‌ێ ئیمه له باوه‌ت قه‌ره‌نتینه سه‌خت نیه‌گرێ! به‌شێگ له خه‌ڵکیش هه‌واڵ له قه‌ره‌نتینه نیه‌پرسن. شاهات ورسێێانه! وه قه‌وڵێگ: «زگ ورسێ، نیه‌پرسێ» یا خاستر بۊشم: زگ ورسێ خۊن که‌ێ! نان له سه‌ر سفره‌گه‌ێان نیه. ورسێه‌ری داسه‌ێان له وه‌ر تا بچن گیان بنه‌نه وه‌ر تیر خه‌ێویه‌و. تیر خه‌ێو کورونا!. کورونایش له شوون ئاێه‌مه‌یل بێ ده‌رد نیه‌گه‌ردی! نیه‌پرسێ: «ت کیید؟!». هه یه‌سه گ تا ئه‌وره‌گ وه‌ێ چۊنه نووڕیمن وه قه‌ره‌نتینه و قانوون و کار و ...، کورونایش میه‌وانمانه و باێه‌س ئڕاێ عه‌زیزه‌یل گرفتارمان ته‌نیا که‌ومڕ بکیشیمن. وه‌ڕاس «ئێ ئاشه وه‌ێ سۊرا نیه‌ڕه‌سێ!». وه ئێ قه‌ره‌نتینه‌یله‌و کار ئه‌و په‌رتخ نیه‌چوود.
شاهات خاستر یه بۊ گه بوه‌تیایمن:«ئێ ئه‌ڵه‌مه وه‌ێ چه‌مه‌را نیه‌ڕه‌سێ!». چێ و گوزه‌یشت. شاهات منیش وه‌ێ چۊنه گ نۊسم ئۊه له دڵ خوه‌دانه‌و بۊشین: فڵانی ئه‌سپ خوه‌د میه‌نێ مه‌که! وه ڕاس ئه‌سڵیش هه‌ر یه‌سه!. خوه‌میش زانم ئاو زه‌ل ده‌م ئه‌ما باێه بۊشم: له‌ێ ڕووژه‌یله گ مه‌ردم گشتێ نگه‌ران بانانن، فره له مۆدیره‌یل نه‌تۊه‌نم کرماشان له ناو دڵه‌و سێچقانی که‌ن! فره لیان ئۊشن خودایا شکرد! چۊن دی که‌س وه‌خت یه نه‌ێرێ له کار ئیمه هۊرده‌و بوود و ئێراد بگرن!. نیه‌زانن ئێ میزه‌یل ڕیاسه‌ته چۊ ئه‌سپ مه‌ردمن! و نیه‌زانن« ئه‌سژ مه‌ردم زۊ پا له لێ تیه‌رنه‌و» ئه‌وسا گ پا هاوردنه‌و، ده‌رد خه‌ڵک که‌فێده گیانێان و شاهات ئاه مه‌ردم ئاگر بێ دۊدی بخه‌ێده ده‌ر ماڵێان و...
زانم پایز ساڵ 1399 سه‌خت‌ترین پایز سه‌د ساڵ له‌ێره‌وه‌ره. ویرووس چینی، ته‌وڵ مه‌رگ فره‌ێگ خسێه‌سه ده‌ر ماڵه‌یل. فه‌قر ده‌ر ماڵ فره که‌س کوتاێه و نان له‌ێ ڕووژه‌یله، ئارد ناو دڕگه .کورونا و گرانی، ئاگر نانه‌سه کوڵه وشکه‌و.خوشی له ناو ماڵه‌یل مه‌ردم ئه‌و ڕێ پاو کڵاش خوه‌ێ نه‌وساس . ئاو وه کوانێ فره که‌س چێه.
ده‌روه‌چه‌یل ئمێد هه‌میشه وازان. هه‌م ئۊه دین و هه‌میش ئیمه دیمه گ ده‌وڵه‌ت ڕه‌وحانی هه‌ر سه‌ێ ئاو خسه‌و بان بێڵ بڕێگ، ئه‌ما کار فره‌ێگ له ده‌سێ ئڕاێ کرماشان نات. کورونایش وه‌ن تره‌ک ناو بانێ. چۊنه گ فره له کاره‌یل مه‌ردم وه بێکاری ڕه‌سی و هه‌ر چێ هێز گرتن، ئه‌و ڕان ڕاس نه‌نیشتن. تا ئه‌وره گ تۊه‌نسیمن نه‌قد کردیمن ئه‌ما وه‌ڕاس چمان بلوور ئڕاێ گا ژه‌نیمن!. چه‌وه‌ڕێ بانانیم و ده‌وڵه‌ت تره‌ک. ئێشالا گ بانان چۊ ئمڕوو نه‌ود و ئیمه‌یش نه‌ۊشیم: «ئه‌ر خوه‌ره، وه‌ێ وه که‌چه‌ڵ، نه‌ر وارانه وه‌ێ وه که‌چه‌ڵ!».
هفتهنامه صدای آزادی